Ministrja e Punëve të Jashtme dhe Diasporës, Donika Gërvalla ka vizituar familjen e Muharrem Rexhepit në Mitrovicë.

Me anë të një postimi në Facebook, Gërvalla tha se më 9 qershor të vitit 1999 Muharrem Rexhepi u rrëmbye nga forcat serbe dhe nuk u kthye më, duke lënë pas dhimbje të madhe dhe një boshllëk të pamundur për t’u mbushur.

“Simbol i forcës dhe qëndresës për atdhe, Familja e Muharrem Rexhepit në veri të Mitrovicës Më 9 qershor 1999, ditën e nënshkrimit të Marrëveshjes së Kumanovës, kur gjithë Kosova po kalonte një moment të ri, familja Rexhepi përjetoi një tragjedi. Muharrem Rexhepi u rrëmbye nga forcat paramilitare serbe, dhe kurrë nuk u kthye më. Po atë natë, shumë fqinjë të tyre nga lagjja “Te Tre Rrokaqiejt” u masakruan, duke lënë pas dhimbje të madhe dhe një boshllëk të pamundur për t’u mbushur”, ka shkruar Gërvalla.

“Bajrami, djali i Muharremit, ishte vetëm 22 vjeç në atë kohë, një djalë i ri që u bë shtyllë e fortë për nënën Elfije dhe për familjen, duke qëndruar i patundur për të ruajtur dinjitetin dhe kujtimin e babait të tij dhe nuk u dorëzuan përballë sulmeve të vazhdueshme dhe kërcënimeve të shumta. Shumë e nderuar që vizituam nënën Elfije, gruan e Muharrem Rexhepit, një grua e fuqishme që mbajti gjallë shpresën dhe dinjitetin e familjes, përballë sfidave të paimagjinueshme. Qëndrueshmëria e familjes Rexhepi është motiv për brezat e ardhshëm, një kujtesë se dinjiteti dhe shpresa janë të pamposhtura, përballë çdo sfide. Lavdi jetës dhe veprës së Muharrem Rexhepit”, tha Gërvalla./Arbresh.info